39w4d四圍走

距離預產期還有3日小b依然沒有動靜, 我這位’坐唔定’既準媽媽又想外出感受年近歲晚的氣氛。

湊巧友人y送來芋頭糕和油角,其中一份是送給友人w, 當速遞員送糕又可順道和友人w午膳。出門前收到多個來電, 首先是外子:「有事記得打俾我?」我反問:「我會有什麼事?!」外子叮囑:「例如見紅之類啦, 好多人食食吓飯會肚痛之後生得, 總之有咩事記得打俾我!」

之後收到老媽來電,「你點呀!今日冇咩事呀?有事記得打俾我, 呢幾晚我都吾會熄電話!」

緊接著是鄰居c, 「喂做乜有咗唔話俾我知!吓你預產期係年初一, 會吾會見到你上電視………生左記得通知我………」今天我最’記得’就是要〈打電話〉。

午飯過後到citysuper為外子選購蘿蔔糕, 店內有華麗園、大師姐、八珍專櫃最後選購了八珍750g裝臘味蘿蔔糕。完成任務後見四周店舖仍在減價中, 抱著’唔買都睇下’的心態又在商場內外逛上個多小時, 可能今天在街上逛得太耐, 肚皮突然抽搐滿身冒汗心跳加速, 要坐下來休息十數分鐘才能繼續前行, 小b告訴我是時候回家, 返到家中馬上躺在床上小睡休息。

小b愈來愈重陀著他四圍去有點吃力偶會腰背痛,但肚皮內的他會跟我互動, 很享受這種重量的感覺。

~倒數3日~